ALBERTINIA NUUS - Dennis Karelse, skoolhoof van Hoërskool Albertinia het reeds aan die personeel, leerders en ouers bekendgemaak dat hy bedank en sal einde Augustus uittree.
Karelse het besluit om sy vlerke te sprei. "Ek glo daarin om jou drome na te streef en dit was nog een van my drome om eendag oorsee te gaan. Die geleentheid het op my pad gekom en aangesien ek altyd jongmense leer dat wanneer iets op jou pad kom, gryp dit aan, dis 'n doel wat die Here met jou lewe het. 'n Mens is soms so bang vir die onbekende sonder die Here."
Hy het 'n pos aanvaar as skoolhoof by die Gulf International School in Muscat, hoofstad van Oman in die Midde-Ooste.
Hy vertel hy was 16 jaar by Gerrit du Plessis Senior Sekondêre skool en het bedank, want 'n mens verval so maklik in 'n gemaksone.
Daarna was hy deeltydse lektor by die Suid-Kaap Kollege, Khanya-fasiliteerder asook projekbestuurder - implementering. In 2010 neem hy leisels oor as skoolhoof van Hoërskool Albertinia. Met sy sterk Christelike waardes het hy besef dat hy Jesus moet terugbring in die skool... nie net onder die mede-personeel en beheerliggaam nie, maar ook die leerders en ouers.
"Ek het hul bewys dat jy niks kan doen sonder Jesus nie en dat Christenskap deel is van opvoeding. Ek voel ek het dit bereik en laat hul met 'n geruste hart, want ek weet die goeie en vaste standaarde is gelê by elke leerder, personeellid en die ouers."
Annelie Booysen, die adjunk-hoof sal waarneem as hoof tot die pos geadverteer word.
Met die vraag wat was sy hoogtepunte die afgelope jare by die skool antwoord hy: "My toekenning toe ek aangewys is as beste skoolhoof in die Wes-Kaap, asook daarna een van die top drie skoolhoofde in die land. Dan natuurlik almal betrokke by Hoërskool Albertinia wat my bygestaan en ondersteun het om die skool te laat uitstyg tot waar dit vandag staan."
Lees vorige artikels hier onder:
ARTIKEL: ELIZE BLOM, SUID-KAAP FORUM - JOERNALIS
'Ons bring jou die nuutste Albertinia, Hessequa nuus'
