HEIDELBERG NUUS - Die Grootvadersbosch-natuurreservaat naby Heidelberg het weer vir besoekers geopen.

Volgens Loren Pavitt, bemarkings- en kommunikasiebestuurder vir CapeNature, is stappers, fietsryers en hengelaars weer vanaf Maandag, 6 Julie toegelaat om die park binne te gaan, onderhewig aan streng toepassing van veiligheidsmaatreëls.

Alle besoekers moet te alle tye 'n masker dra en elkeen se temperatuur sal geneem word. Ook kontakbesonderhede sal neergeskryf word. Geen piekniek, kampering of oornagverblyf word toegelaat nie.

Hoewel besoekers aangemoedig word om in pare te stap, word georganiseerde groepe steeds verbied.

Toegangspermitte word slegs aanlyn of deur die kontaksentrum verkoop en moet dus reeds voor aankoms by die reservaat aangeskaf word.

Dié 250ha inheemse bos met sy wandelpaaie en bergfietsroetes spog volgens CapeNature se webwerf met meer as 196 voëlspesies en byna al die soorte tipiese woudbome soos stink-, yster- en geelhout.

'Ons bring jou die nuutste Heidelberg, Hessequa nuus'