TUINROETE DISTRIKNUUS - 'n Plaatmaker van Group Editors, wat 'n formidabele 38 jaar dienstydperk agter die rug het, het na 'n leeftyd se koerante, sy laaste plate geëts.
Bevin Louw (61) het week na week van Oudtshoorn, sy tuisdorp, gereis om by die drukafdeling van Group Editors in Ringweg in die George-nywerheidsgebied aan te sluit.
Louw is een van die eerste personeellede wat in 1983, kort na die ontstaan van die maatskappy, 'n pad saam met die eienaar, Peter Moolman, gestap het.
"Wat sê 'n mens van iemand wat soveel werkstrots getoon het, en so pligsgetrou was?" Dit was Moolman se eerste reaksie tydens 'n gesprek oor Bevin.
"Bevin was ons heel eerste vakleerling," het Moolman gesê.
"Dit was nooit nodig om hom te vra om sy deel te doen nie. Dit sou wonderlik wees as almal in Suid-Afrika met soveel trots hul werk verrig het. Wanneer Bevin 'n spelfout gesien het, het hy inderdaad die drukproses gestop. Ons gemeenskapskoerante was sy trots."
'Ons bring jou die nuutste Tuinroete, Hessequa, Karoo nuus'
