STILBAAI NUUS - Wat meer as ’n dekade gelede met net sowat 20 lede begin het, het intussen tot ’n gevestigde organisasie met 490 lede gegroei.

Nou maak die University of the Third Age (U3A) Stilbaai gereed om sy 10de bestaansjaar te vier.

Die organisasie sal dié mylpaal tydens sy laaste byeenkoms van die jaar op 23 November vier.

Volgens dr. André Smith, voorsitter van U3A Stilbaai, het die organisasie sedert sy ontstaan aansienlik gegroei, en bied dit vandag ’n verskeidenheid aktiwiteite wat daarop gemik is om veral afgetredenes intellektueel en sosiaal aktief te hou.

Die U3A is ’n internasionale beweging wat daarop gemik is om ouer mense se lewensgehalte deur voortgesette leer, kennisdeling en stimulerende aktiwiteite te bevorder. 

Die beweging het in 1972 in Frankryk ontstaan en later wêreldwyd uitgebrei. Die eerste U3A in Suid-Afrika is in 2000 in Kaapstad gestig.

In Stilbaai het Stefan Pretorius, wat voorheen by U3A Valsbaai en Kaapstad betrokke was, die beweging in Mei 2015 met net meer as 20 lede begin.

Teen die tyd dat die organisasie formeel gestig is, het die lidmaatskap reeds tot meer as 130 gegroei.

Volgens Smith beskik Stilbaai oor talle afgetrede inwoners met waardevolle kennis en ervaring wat hulle graag met ander deel.

Die organisasie bied gereeld lesings oor uiteenlopende onderwerpe aan, waaronder geskiedenis, wetenskap, die omgewing, ekonomie en reiservarings.

Daarbenewens is daar verskeie belangegroepe wat onder meer fotografie, stap, kunsmatige intelligensie, neurowetenskap, voëlkunde en reis dek.

Dié aktiwiteite bied lede nie net geleenthede om nuwe kennis op te doen nie, maar ook om sosiaal betrokke te bly en nuwe vriendskappe te sluit.

Die 10de bestaansjaarviering op 23 November bied lede die geleentheid om terug te kyk op ’n dekade van groei, kennisdeling en gemeenskapsbetrokkenheid.

‘Ons bring jou die nuutste Tuinroete, Hessequa, Karoo nuus’