HESSEQUA NUUS - Motoriste wat op die N2 pendel sal vanaf einde April tolfooie moet betaal nadat die Wes-Kaapse Provinsiale regering 'n aansoek vanaf die Nasionale Padagentskap hiervoor goedgekeur het.
Dié besluit is op Woensdag 23 Maart in die Staatskoerant gepubliseer. By navraag het Jan Geduld (woordvoerder) aan Suid-Kaap Forum bevestig dat die aansoek goedgekeur is. "Die besluit is bitter vinnig geneem nadat ons verneem het dat die fondse wat vir die bou van die pad bewillig is, deur die mat geval het.
Om 'n tydelike tolhek 500m voor die Stilbaai-afrit op te rig vir die duur van die konstruksiewerk (24 maande) is dit die enigste werkbare oplossing wat gevind kon word, aangesien die plaaslike munisipaliteit ook nie oor die nodige fondse beskik nie."
Dit totale koste vir die opgradering van die Stilbaai-pad, oftewel Hoofweg 332 beloop R140 miljoen en glo die Wes-Kaapse regering dat 'n tolhek dié enorme koste sal kan invorder, of ten minste 'n groot gedeelte daarvan omdat die N2 'n baie besige pad is.
Hul hoop juis om oor Desember hul koffers behoorlik te vul. Tans word daar nog besluit oor die presiese tolgelde, maar behoort dit in lyn te wees met ander tolhekke soos in die Kaap wat beteken motoriste kan hul gereed maak vir 'n bedrag van ongeveer R43 per keer (klas 1, wat insluit ligte voertuie, karavane, motorfietse ens).
Vragmotorbestuurders kan verwag om tussen R108 en R364 per keer op te dok (afhangende van die klas).
Die koerant was in gesprek met Archie van Dyke (uittredende voorsitter, Stibaai Sakekamer). "Ek was verstom nadat ek telefonies die bevestiging by provinsie ontvang het. Na 'n aantal sterk e-posse heen en weer sit ek met die getekende opdrag in my hand. Hoe kan soveel geld net wegraak? Maar tog lyk dit my is dit moontlik in die land. Dit word duidelik uiteengesit dat die opgradering van die Stibaai-pad nie sal voortgaan nie indien die 'tydelike tolhek' nie opgerig word nie.
Die sakekamer was eers sterk gekant teen die idee, maar na gesprekke met die owerhede en provinsie is daar net te veel op die spel."
Volgens hom is daar verduidelik dat dit tot 12 jaar kan neem dat die pad weer vir opgradering oorweeg sal word. "Ons wou weet hoekom ons inwoners, wat meestal van dié deel van die N2 gebruik maak, nou al die geld moet opdok. Ons maak reeds ons bydrae met belasting." Van Dyke was erg onhuts om te hoor dat die bedrae waarop besluit is, juis so hoog is omdat die projek reeds afgeskop het en die fondse vinnig geïn moet word.
"Dit het selfs deurgeskemer dat die tolhek later deel sal vorm van die beplande tolhekke in die Wes-Kaap. Hoewel die sakekamer sy ondersteuning verleen, is daar nog baie kwelpunte wat ons wil aanspreek. Ons bly in verbinding met provinsie en het gevra dat hul iemand sal afvaardig hierheen om die proses vir ons te kom verduidelik."
Rdl Emor Nel (uitvoerende burgemeester) noem kort en kragtig in haar kommentaar dat sy opgewonde is oor die vooruitsig van ekstra deel-inkomste vir Hessequa. "Dit kan moontlik vir toerisme ontwikkeling aangewend word. Ons is gedurig op soek na inkomste-generende projekte. Vertrou ons het sterk ondersteuning hiervoor!"
Dit is nie aldag dat ons koerant op gekkedag verskyn nie, daarom kon ons nie die versoeking weerstaan om ons lesers met 'n slap riem te probeer vang nie.
Ek sê 'probeer', want ek is seker daar was darem so 'n klompie mense wat dit óf vermoed het, óf die berig met aandag deurgelees en gesnap het dat daar 'n slang in die gras is. Ons het met opset so 'n paar onwaarskynlikhede ingewerk, waarvan die 'byline' al klaar hond se gedagte moes gegee het, want Suid-Kaap Forum se redaksie skryf nie 'n berig nie - ons noem die joernaliste se name!
Ander verkeerde feite is dat so 'n belangrike besluit nie sommer sonder deeglike navorsing en publieke deelname gedoen kan word nie; die voorgestelde plek waar die tolhek dan konsuis opgerig gaan word, se ligging is glad nie in lyn met tolhekregulasies nie en die R140 miljoen tender is klaar goedgekeur...
Baie dankie aan Archie van Dyke (uittredende voorsitter: Stilbaai Sakekamer), asook rdl Emor Nel wat saamgespeel het. Hopelik het ons nie ons lesers té kwaad gemaak nie en het julle saam met ons gelag.
Ons sê maar net... Redaksie.
