STILBAAI NUUS - Met die 2026 Comrades-marathon net dae weg het nege Stilbaai-hardlopers wat aan die wêreldbekende ultramarathon gaan deelneem, Saterdag 6 Junie tydens die Stilbaai-Wes-parkrun 'n gepaste afstuur ontvang.
Na 'n vroegoggend oefensessie het die groep by die beginpunt van die Stilbaai-Wes-parkrun byeengekom waar Nico Steenekamp, organiseerder van die Stilbaai-Wes-parkrun, hulle alle voorspoed toegewens het vir die uitmergelende wedloop tussen Durban en Pietermaritzburg op Sondag 14 Junie.
Vanjaar se op-wedloop strek oor 'n afstand van 87 km.
Die afstuur was besonder gepas aangesien die legendariese Bruce Fordyce, wat 30 Comrades-wedlope voltooi en nege keer gewen het, die parkrun-beweging na Suid-Afrika gebring het.
Die Stilbaai-Wes-parkrun het daarom die geleentheid gebruik om die plaaslike deelnemers aan te moedig voordat hulle die groot uitdaging aanpak.
Onder die deelnemers is Ronelle Moller, wat haar 21ste Comrades-marathon gaan voltooi.
Vir haar is vanjaar se deelname egter ekstra spesiaal omdat sy die wedloop saam met haar man aanpak, wat sy 10de Comrades gaan hardloop.
Om vir die Comrades te kwalifiseer, moes deelnemers tussen 9 Junie 2025 en 4 Mei 2026 'n amptelike marathon van 42,2 km in minder as vyf uur voltooi.
Die parkrunoggend het ook ander prestasies opgelewer.
Adamia du Bois van Stilbaai het haar 200ste parkrun voltooi - 'n merkwaardige mylpaal wat vir haar besondere betekenis inhou.
Sy het 190 van dié parkruns voltooi nadat sy behandeling vir kanker, insluitend chemoterapie en bestraling, ondergaan het.
Nog 'n plaaslike hardloper, Katja Nothnagel, het uitstekende vorm getoon deur as algehele wenner oor die 5 km-roete te eindig. Sy het 'n persoonlike beste tyd van 22 minute en 51 sekondes aangeteken.
Haar prestasie was des te meer indruk-wekkend omdat groot hoeveelhede hiasinte op die strand uitgespoel het, wat veroorsaak het dat deelnemers die strandgedeelte van die roete in los sand moes voltooi - omstandighede wat die wedloop aansienlik moeiliker gemaak het.
Met die Comrades-marathon nou op hande, sal die Stilbaai-gemeenskap met trots hul plaaslike atlete ondersteun wanneer hulle Sondag een van die wêreld se grootste uithouvermoë toets aanpak.
‘Ons bring jou die nuutste Tuinroete, Hessequa, Karoo nuus’
