MELKHOUTFONTEIN NUUS - Dit gaan baie goed met baba van Rheenen wat op 29 Desember in 'n motor gebore is.
Suid-Kaap FORUM het gaan inloer by die kleinding, Joshie (twee weke), sy ma, Maria (39) en Rosina Bito (59) wie bystand verleen het tydens die geboorte.
Bito vertel dat sy vir jare reeds vrywillig die mense van Melkhoutfontein help, veral nadat sy twee jaar op die ambulans gewerk het. Sy vertel dat toe sy by Van Rheenen se huis opdaag was sy reeds in kraam.
"Maria se man het my gebel om te kom help". Die ambulans is wel gebel, maar is besluit om saam met Koos Daries per motor te ry tot hulle die ambulans langs die pad kry.
Die verkeer was egter so druk dat hulle nie kon stop toe die ambulans verby hulle is nie. Die klein mannetjie het ander planne gehad en is by Soetmelksfontein in die voertuig gebore. “Dit was ‘n maklike kraam. Ek het die naelstring om die nek gehaal, sy lippies was potblou en ek het ook die slym uit sy mondjie gehaal”. Hy het 2.1kg geweeg met geboorte.
Van Rheenen is baie dankbaar vir Bito se hulp met die geboorte en is erg danig oor die kleinding. “Hy is baie gesond, eet en slaap goed en is ook baie soet.”
Bito gaan voortaan vir Maria Dyason help met die gestremde kinders van Melkhoutfontein by Villa Rosa wat geleë is in die ou kliniek op Melkhoutfontein. Sy het egter die hulp van die gemeenskap nodig.
Sy benodig donasies van verf, 'n stoof, yskas, kot, beddens, speelgoed en klere. Die fasiliteit sal 24-uur oop wees. Enigiemand wat dit in hul weg sien om by te dra kan vir Bito skakel by 078 641 4960.
ARTIKEL EN FOTO: LOUISE MOUTON, SUID-KAAP FORUM-JOERNALIS
Klik hier vir 'n vorige nuusflits.
'Ons bring jou die nuutste Melkhoutfontein, Hessequa nuus'
