Ongelukstatistiek op N2 bly styg

ALBERTINA NUUS - Dié dorpie bly in die nuus na 'n derde ongeluk in slegs 'n week se tyd, waarvan twee ernstig was.

Suid-Kaap Forum het in verlede week se uitgawe (Donderdag 17 November) berig van 'n ongeluk op die N2 by Ystervarkfontein waarin twee persone noodlottig beseer was.

Slegs 'n dag later, op Vrydag 18 November om ongeveer 05:45 vind nog 'n ongeluk plaas, dié keer op die N2 by Driefontein waarin 'n Toyota-voertuig en 'n vragmotor betrokke is. Hoewel niemand dood is nie, is erge skade aan beide voertuie en die inhoud van die vragmotor aangerig.

'n Kort videogreep van die ongeluk is deur 'n leser ingestuur. Uit inligting wat deur kapt Susan Botha (stasiebevelvoerder: Albertinia Polisie) aan Suid-Kaap Forum verskaf is, blyk dit dat die bestuurder van 'n gehuurde Toyota-voertuig by Driefontein gestop om iets uit die kattebak te haal. Hulle het vanaf Kaapstad, rigting Mosselbaai gereis.

Die persoon wat uitgeklim het, het opgemerk dat 'n vragmotor op die kant van die pad na hulle aankom en nie betyds sal kan stop nie.

"Hy het uit die pad gespring, waarna die vragmotor die Toyota met twee insittendes daarin, getref en dit na die kant van die pad geslinger het. Die vragmotor het 'n entjie verder omgeslaan," verduidelik sy.

Die persone wat in die motor was, het blykbaar nie ernstige beserings opgedoen nie. "Die drie persone van die Toyota, asook die vragmotorbestuurder is na Riversdal Hospitaal geneem. Die middeljarige bestuurder het volgens inligting slegs geringe hoofbeserings opgedoen.

Almal is vir skok behandel. Aangesien niemand ernstig beseer of oorlede is en geen padverkeersreëls verontagsaam was nie, is slegs 'n padongeluksverslag geopen," het Botha gesê. Die oorsaak van die ongeluk word nog ondersoek.

Kyk hieronder na die video wat deur die leser ingestuur is: