Zille teken watersekuriteit verklaring

WES-KAAP NUUS - Burgemeesters, provinsiale ministers en premier Helen Zille het 'n Munisipale Verklaring rakende langtermyn watersekuriteit vir die provinsie op 28 Junie onderteken.

Dit is die uitkoms van die Wes-Kaapse Water Indaba wat in Mei plaasgevind het en 'n poging om die voortslepende droogte aan te spreek. Zille het in haar toespraak genoem dat die verklaring provinsiale en plaaslike regering sal verbind tot groter watersekuriteit. "Die hoofdoel is om aksie tot verantwoordelike en volhoubare watergebruik in die provinsie aan te moedig."

Anton Bredell (minister: Plaaslike regering, Omgewingsake en Ontwikkelingsbeplanning) het verduidelik dat dit sewe punte bevat.

Dit sluit in:

• Verbetering van waterbesparingspogings, insluitende beplanningsbeginsels om die vraag per capita op waterhulpbronne permanent te verminder
• Vermindering van waterlekkasies
• Erkenning van die noodsaaklikheid om grondwater verstandig te bestuur
• Diversifisering van watervoorsiening
• Die beskerming van die gehalte en integriteit van waterhulpbronne
• Wetgewende opknapping in gebiede waar nodig

• Water innovasie.

Tans is een van die grootste uitdagings die in diepte hersiening van die provinsie se Volhoubare Water Bestuursplan.

"Dit voorsien 'n strategiese raamwerk vir waterbestuur in die Wes-Kaap. Dit sal as 'n gids vir volhoubare besluitneming in die toekoms dien."

'Ons bring jou die nuutste Wes-Kaap, Hessequa, Tuinroete nuus'