RIVERSDAL NUUS - Die 14de Outeniqua Wheelchair Challenge (OCC) het Saterdag 20 Februarie in George plaasgevind.
Volgens Ansie Swart, die resies-direkteur groei hierdie resies elke jaar. In 2002 met die eerste OCC aanbieding het slegs 27 atlete deelgeneem en vanjaar het 1 337 atlete vanuit al nege provinsies in Suid-Afrika, Zimbabwe en Skotland deelgeneem. Sy noem dat daar 'n groot behoefte onder gestremdes vir sulke geleenthede is waaraan hulle kan deelneem.
'n Plaaslike kwadrupleeg, André Koen waaroor Suid-Kaap Forum al vir 'n geruime tyd berig het, was deel van die 42.2km resies.
Hy vertel dat hy slegs twee maande gehad het om te oefen, maar is trots op wat hy met die OCC bereik het. Volgens hom was dit 'n lekker ervaring, maar ook 'n strawwe uitdaging. Hy het per ongeluk op die 19km merk sy fiets omgekeer, maar het slegs skrape opgedoen.
"Die beamptes was gou by om my weer regop te bring sodat ek kon aangaan met die wedren." Hy het 'n brons medalje verower.
Met sy deelname het dit vir hom goeie ondervinding en oefening gegee, want hy is hard aan die oefen vir die Argus wat Sondag 6 Maart in Kaapstad plaasvind.
André Koen is 'n kwadrupleeg vir die afgelope 26 jaar en sy grootste droom was nog altyd om 'n handfiets te besit waarmee hy aan wedrenne kon deelneem.
Sy wens is bewaarheid toe die 'Chaeli Campaign' - 'n nie-winsgewende organisasie wat hulle daarop toespits om fondsinsamelings te doen vir gestremde kinders vir hom 'n handfiets geskenk het met die ooreenkoms dat hy aan die Argus moet deelneem in hul kleredrag, asook fondse vir hul insamel.
Klik hier vir verwante artikels:
- Koen se droom bewaarheid
- Kwadrupleeg se droom bewaarheid
- Help kwadrupleeg met sy droom
- Help kwadrupleeg sy droom bewaarheid
ARTIKEL EN FOTO: ELIZE BLOM, SUID-KAAP FORUM-JOERNALIS
'Ons bring jou die nuutste Riversdal, Hessequa nuus'
