RIVERSDAL NUUS - Die saak van aanranding wat teen 'n voormalige DA proporsionele raadslid aanhangig gemaak is, is teruggetrek.
Dit kom nadat hy Maandag, 17 Augustus in die Riversdal Landdroshof verskyn het. Volgens inligting bly die klagte wel op die hofrol, maar gaan die saak nie voort nie. By navraag by Riversdal Polisie het die waarnemende stasiebevelvoerder, kapt Johan van Tonder bevestig dat die klaer, Johannes se saamleefvrou, Marcele Buis die staatsaanklaer versoek het om die kriminele klag teen hom terug te trek.
Johannes het haar na bewering aangerand en het dit Vrydag, 31 Julie rugbaar geraak nadat die ANC 'n persverklaring en foto's rondom die voorval uitgereik het. Dit het na blykbaar Dinsdag, 28 Julie om 15:00 by hul huis op Riversdal gebeur.
Die uitvoerende burgemeester, rdl Emor Nel noem in kommentaar aan Suid-Kaap FORUM dat hul verneem het dat die saak op versoek van die klaer teruggetrek is. "Die bedanking van Richard Johannes het hom gevrywaar van dissiplinêre optrede soos deur die gedragskode vir raadslede toegepas sou word."
Die Hessequa Raad is tans in die proses om 'n nuwe proporsionele raadslid in sy plek aan te wys. Nel het bevestig dat hulle tans op die provinsie se goedkeuring wag voor die nuwe DA- proporsionele raadslid bekendgemaak word.
In gesprek met Johannes noem hy dat hy verlig is dat die gereg sy gang gegaan het. "'n Saak het altyd twee kante." Volgens hom oorweeg hy dit wel om aanstaande jaar weer toe te tree tot die politiek.
Lees vorige artikels hier:
- Klagte teen voormalige raadslid teruggetrek
- DA-raadslid aangekla
- Raadslid in hof na beweerde aanranding
- Raadslid bedank na beweerde aanranding
ARTIKEL: LOUISE MOUTON, SUID-KAAP FORUM - JOERNALIS
'Ons bring jou die nuutste Riversdal, Hessequa nuus'
