RIVERSDAL NUUS - Die Hoër Landbouskool Oakdale is bekend vir 'n tradisie van trots, entoesiasme en puik prestasies wat oor jare heen gehandhaaf word.
"Alhoewel daar oor jare heen min personeelwisseling by hierdie skool plaasvind, is dit deel van die skool se toekomsvisie om jonger personeel te mentor ten einde 'n waardevolle rol in die toekoms te kan vervul," het die skoolhoof, André Latsky gesê.
Vanjaar het vier nuwe personeellede by die skool begin. Helma van Zyl is aangestel as sekretaresse/ontvangsdame, terwyl drie oudskoliere in 'n ander hoedanigheid hul terugkeer maak. Van Zyl was vir die vorige paar jaar sekretaresse by Hoër Jongenskool Paarl.
Tienie van Wyk, hoofseun in 2010, het verlede jaar sy studies voltooi en is aangestel as onderwyser in die vakke Wiskunde en Landboubestuurspraktyk.
Adriaan Jansen is aangestel as biokinetikus wat saam met Lukas Holtzhauzen die nuwe sportsentrum sal bestuur. Hy sal ook by die kondisionering van sportspanne en rehabilitasie van sportbeserings betrokke wees. Evert Kleynhans is aangestel as onderwyser-assistent en is tans besig met die voltooiing van sy onderwyskwalifikasies.
"Ons beskik tans oor twee onderwyser-assistente en die skool lewer hiermee 'n positiewe bydrae tot die voorbereiding van toekomstige onderwysers. Oakdale is opgewonde oor die betrokkenheid van 'jongbloed' in die personeel vir 2015 en glo dat die Oakdalers die nuwe personeel met groot entoesiasme sal betrek," het Latsky afgesluit.
'Ons bring jou die nuutste Riversdal, Hessequa nuus'
