HEIDELBERG NUUS - Die moordbeskuldigde, Virgil Pretorius (32) se borgaansoek Maandag 5 Junie in die plaaslike landdroshof is geweier, tot groot verligting van die plaaslike gemeenskap.
In teenstelling met sy vorige verskynings, was daar sowat 80 mense buite waarvan 50 in die hof toegelaat is, waaronder sy ma, Dina en suster, asook die slagoffer, Candice Alberts (33) se ouers, pastoor Tommy en sy vrou, Cathy.
Alberts se lyk is Saterdagoggend 22 April sowat 1,5km vanaf die R322 (Witsand-pad) by die Renosterfontein-afdraai onder bosse gevind.
'n Memorandum is weereens deur die betrokke leiers aan die plaaslike landdros, Michael Delport oorhandig wie dit aan landdros Shirley Freeman besorg het wat die borgaansoek behartig het.
Ongeveer 15 ontstoke inwoners het weereens met plakkate en 'n groot banier oorkant die hof betoog.
Tydens die hofverrigtinge is dit bevestig dat nagenoeg 300 inwoners 'n petisie teen Pretorius se vrylating op borg geteken het. Dit het deel uitgemaak van Freeman se byna uurlange uitspraak.
Volgens haar het sy alles in ag geneem van beide die staat en verdediging se betoogshoofde en het sy bevind dat die misdaad 'n bylae 6 artikel 60 (4) A, C en E misdryf is en dat dit aan voorbedagte rade voldoen. Verder het sy genoem dat dit 'n baie brutale misdaad was waarin die slagoffer 21 keer met 'n mes gesteek en dan ook gewurg was.
Pretorius bly in Buffeljags Gevangenis in aanhouding tot sy volgende verskyning op 7 Augustus.
Klik hier vir vorige artikels:
- Vrou se lyk gevind: Borgaansoek uitgestel
- Polisieversterkings by hof ingeroep
- Kommer oor 'ongerymdhede' by hof
- Opvolg: Inwoners in opstand teen polisie
- Heidelberg-polisieman aangekla van moord
- Opvolg: Polisielid in hof vir moord
- Opvolg: Polisielid aangekla van moord
- Vermiste vrou dood gevind
- Jong vrou verdwyn spoorloos
'Ons bring jou die nuutste Heidelberg, Hessequa nuus'
