RIVERSDAL NUUSFLITS - Dawid Kamfer, vuurvreter politikus en raadslid van Mosselbaai is Saterdag onbestrede as Wes-Kaap provinsiale voorsitter van ICOSA in die Riversdal Burgersentrum verkies.
Kamfer, voormalige provinsiale woordvoerder en sy bestuur van 17 lede is almal onbestrede voorgestel deur Allan Kock, voormalige burgermeester van Knysna. Kock was tot twee weke nog lid van COPE. Kock en sy span van voormalige COPE lede was nie die enigste nuwe lede wat hulle by die party aangesluit het nie.
Pastoor Petrus Herandien, voormalige DA raadslid van die Witzenburg Munisipaliteit en Piet Waterboer, beide van Wolseley, het ook by die party aangesluit en is luid toegejuig. Kamfer wat ook Saterdag sy verjaarsdag gevier het, kon nie vir ’n beter verjaarsdag geskenk gevra het toe hy onbestrede voorgestel is as voorsitter.
Volgens Kamfer gaan hy homself beywer om te verseker dat ICOSA in elke munisipaliteit raadslede in kry. “Ek is ’n dienaar van die mense en sal saam met goeie samewerking van my mede-bestuurslede verseker dat ons raadslede in al die rade kry” aldus ’n selfversekerde Kamfer.
Lees meer in Donderdag se Suid-Kaap FORUM, asook aanlyn.
Jeffrey Donson, nasionale voorsitter van ICOSA, staan hier in die middel saam met die delegate van Slangrivier, Riversdal en ander partylede. Van links staan: Jobieth Hoogbaard, Ricardo Herandien, JB Hoogbaard, Ellinet Hartnick, Bradley Benades, Klaas Lesholi- hoofsekretaris, Sophia Thyssen, Reginald Timmie en Ampie Moses.
'Ons bring jou die nuutste Riversdal, Hessequa nuus'
