SLANGRIVIER NUUS - Nagenoeg 1500 roubeklaers het Saterdag, 27 Junie hul laaste eer aan Denzil (Dapperman) Stoffels betoon.
Familielede, vriende, kollegas, rugbyspe-lers en amptenare het die begrafnisdiens van dié plaaslike ambulansman op die plaaslike sportgronde en daarna die ter aardebestelling in die begraafplaas bygewoon.
Hy is noodlottig beseer in 'n ongeluk op die N2 net voor die Houwhoek Pas buite Grabouw op Dinsdag, 16 Junie terwyl hy en sy gesin op pad huis toe was uit Kaapstad.
Sy enigste dogter, Gersha Flink (14), 'n graad 8-leerder van Slangrivier Primêre skool het Woensdagaand, 17 Junie in die Tygerberg Hospitaal gesterf.
Sy word Saterdag, 3 Julie op Van Rhynsdorp begrawe. Sy pa, Daniël, is uit die hospitaal ontslaan en het die diens in 'n rystoel bygewoon. Sy vrou, Gertrude, is nog in 'n bewustelose toestand in die waakeenheid by Tygerberg.
Verskeie sprekers, waaronder Hennie Baartman (SWDRU president), Llewellyn Nankoo (distriksbestuurder: Eden EMS), Henry Bush (senior bestuurder: Hessequa EMS), Des Abrahams (voorsitter: Arrows Rugbyklub), lt Llewellyn Smith (SA Weermag), Mark Fillis en Isaac Langeveldt (onderwysers wat vir hom skoolgehou het), het met groot lof van Stoffels as mens, werker, sowel as sportliefhebber gepraat.
Bush het gesê dat hy Stoffels nie net as werker sal mis nie, maar dat hy 'n seun verloor het. Abrahams het beklemtoon dat Stoffels groot vertroue by die spelers ingeboesem het en dat hulle as klub sy passie, dissipline en ambisie sal nastreef.
Hy het namens Arrows 'n hemp aan sy broer, Marthinus oorhandig.
Baartman het gesê dat dit gepas was om die diens op die rugbyveld te hou waar Stoffels sy sport uitgeleef het.
Volgens hom is die groot skare begrafnisgangers 'n getuigskrif van die stempel wat hy in hul lewens afgedruk het.
Hy het namens SWDRU twee rugbyballe aan Stoffels se twee seuns, Kyle en Dale oorhandig as blyk van waardering vir sy bydrae tot die sport.
Smith, 'n kollega met wie hy 10 jaar in die weermag gedien het, het benadruk dat oral waar 'Daniël' aangedoen het, het hy 'n groot impak gemaak. Fillis, wat ook koshuisvader was tydens Stoffels se tydperk as leerder by Swellendam Senior Sekondêre skool, het na hom as 'n meester poetsbakker verwys wat nooit uitgevang kon word nie.
"Hy was altyd 'n tree of twee vooruit, vandaar die bynaam Dapperman," het hy gesê. Past Jabe Hoogbaard, EMS-kollega, het 'n boodskap uit Markus 10 vers 28 voorgehou, terwyl Stoffels se broer 'n huldeblyk gelewer het.
Vorige artikels:
Verwante artikels:
- Jongman sterf in motorongeluk
- N2 gru-ongeluk:Massabegrafnis vir slagoffers
- N2 gru-ongeluk: Trokbestuurder in aanhouding
- N2 gru-ongeluk:Trokbestuurder bly in aanhouding
- 8 sterf in gru-ongeluk naby Swellendam
Daniël Stoffels, vader van die oorledene.
'n Gedeelte van die begrafnisgangers.
ARTIKEL EN FOTO'S: CLIVE PRETORIUS, SUID-KAAP FORUM KORRESPONDENT.
'Ons bring jou die nuutste Slangrivier, Hessequa nuus'
