HEIDELBERG NUUS - Besoekers aan die Heidelberg Landbouskou kan uitsien na 'n behoorlike makietie en prettige feesvieringe tussen 6 en 14 Februarie.
Vic Brand, president van die skou, beloof dat daar vermaak sal wees vir 'n ieder en elk. Die verrigtinge skop af met die skoudans op 6 Februarie om 19:00.
Die tema is Old Hollywood Glam en opwindende pryse is op die spel vir die beste kostuums. Die kroning van die nuwe skoukoningin sal tydens die geleentheid plaasvind. Kaartjies kos R140 en is beskikbaar by Julie, 084 823 9948.
Die skou hou hul eie Skouspel op 9 Februarie om 19:00 by die skougronde. Gewilde sangers Andriëtte Norman en Die Broers sal konsertgangers bekoor met hul musiek. Kaartjies kos R125 en is beskikbaar by Vic, 071 227 6987.
Dames uit die distrik kan weereens uitsien na 'n heerlike damesoggend op 12 Februarie om 09:30 by die Human Willemse Saal. Daar sal 'n inspirerende gasspreker wees en smullekker eetgoed. Kaartjies kos R100 en is beskikbaar by Maretha, 084 548 7149.
Die Steakhouse sal lafenis bied vir die honger- en dorstiges. Dit is ook die ideale plek om saam met vriende te kuier en dans. Vermaak vir die jongspan sluit in ballondiere, trompoppies en 'n vuurvertoning tot kulkunsies, touch rugby, aflos en 'n interskole toutrek-kompetisie. Clanwilliam se rieldansers gaan Vrydag en Saterdag dans dat die stof staan.
Kompetisies soos die Babaskou (Saterdag, 14 Februarie), die junior skoukoning en -koningin gaan aangewys word met groot pryse op die spel en kinders kan hul honde inskryf vir die hondeskou. Daar is verskeie kategorieë met lekker pryse.
Die wye verskeidenheid stalletjies sluit van mooigoed en blinkgoed tot eetgoed en speelgoed in. 'n Hoogtepunt is John Everts en sy span se stalletjie wat besoekers gaan herinner aan hoe die skou in toeka se dae was.
Besoekers kan ook uitsien na 'n kunsuitstalling. Daar is terselfdertyd 'n kunskompetisie vir skole met 'n R7 000-prys op die spel vir die beste uitbeelding van 'n inheemse plant of dier.
Top telers van die Oos-Kaap gaan meeding met dié van Wes-Kaap tydens die Kaapland Holstein kampioenskap, die derde van sy soort by die skou. Oos-Kaap loop tans 2-0 voor in spanverband en beide streke het al met die louere vir die grootkampioen-koei weggestap. Die Suid-Kaap Jerseykampioenskap sal terselfdertyd plaasvind.
"Ek is trots om te noem dat die SA grootkampioen-koei en die Suid-Kaap Jerseyklub kuddekampioen onderskeidelik uit Swellendam en Heidelberg kom en taai kompetisie gaan bied vir besoekers," aldus Brand.
Beide kampioenskappe vind Donderdag, 12 Februarie om 08:00 plaas. Die prysuitdeling sal direk na die beoordeling plaasvind. Vir meer inligting kontak Smiley Cronjé by 082 921 0045.
Die prestige SA Merino Classic-kampioenskap word vanjaar by die skou aangebied, 'n hoogtepunt vir Heidelberg Landbougenootskap se skaapafdeling. Dit begin Woensdag, 11 Februarie om 14:00 in die BKB-skaapring.
"Ons verwag dat die standaard van die inskrywings baie hoog sal wees, omdat hierdie geleentheid Suid-Afrika se top Merino telers sal lok," sê Brand. Die SA Wolvagkompetisie word terselfdertyd aangebied.
BKB se wolbeamptes sal dit beoordeel op lengte, skoon-opbrengs, tipe en micron. 'n Slaglamkompetisie sal ook deur die komitee aangebied word. Die karkas sal opgeveil word nadat die wenners op 13 Februarie aangekondig is.
Die pryswenners van die vagkompetisie en die Merino Classic-kampioenskap sal by 'n spogdinee aangekondig word. Vir meer inligting kontak Pieter Uys by 084 516 6944.
Die landbouskou is bekend vir sy uitmuntende perdeskou en vanjaar word 'n paar SA kampioene by die geleentheid verwag.
Dit begin Woensdag, 11 Februarie om 14:00 met die beoordeling van verskeie perderasse.
Oud en jonk kan daagliks van 08:00 tot 18:00 kom kyk hoe Walliese ponies en Hackney-, Fries-, Vlaam-, ope- en saalperde meeding. Die wa-spanne sal ook geleentheid kry om hulle staal te wys en die alombekende FNB Tuinroete Hackney Streekskampioenskap sal afskop. Vir meer inligting kontak Hans Jurie by 082 811 4954.
'Ons bring jou die nuutste Heidelberg, Hessequa nuus'
