STILBAAI NUUS - Dit het die afgelope week aan die lig gekom dat dit nie net katte is wat vergiftig word op die dorp nie, maar ook honde.
Volgens Elaine Hardy (vrywilliger: Stilbaai Animal Protection) is daar drie gevalle van moontlike vergiftiging by honde aangemeld. Trompie, 'n hond wat aan baie mense bekend is, is die afgelope week vermoedelik vergiftig.
Intussen is nog twee voorvalle aangemeld, beide in die woonbuurt tussen die toerismekantoor, Sterretjielaan en Bosbokstraat.
"Ons het is 'n sterk vermoede dat gif wat gebruik word om van molle ontslae te raak gebruik is.
Ons kan net hoop dit was 'n ongeluk en nie met opset nie." Een van die honde se maaginhoud is weggestuur vir ontleding.
Indien 'n kat of hond 'n probleem is, neem dit op met die eienaars, kontak dierebeskerming of die Hessequa skutmeester. Moenie die wet in eie hande neem nie.
Stilbaai Animal Protection en Community Animal Rescue op Riversdal is by magte om klagtes met betrekking tot dieremishandeling aanhangig te maak by die polisie. Hessequa Munisipaliteit is slegs verantwoordelik vir dierebeheer en nie dierebeskerming nie en kan dus nie optree nie. Probleemdiere kan wel geskut word.
• Stilbaai Animal Protection - 082 700 2491.
• Community Animal Rescue (CARS) - 082 962 1831
• Die Hessequa Skut - 028 713 8000 (kantoorure).
Noodhulp in geval van vergiftiging
Die diagnose van vergiftiging is baie moeilik en is 'n nagmerrie vir enige troeteldier-eienaar. Die goue reël is om die hond dadelik veearts toe te neem as jy vergiftiging vermoed.
Dit kan baie gevaarlik wees om die hond self te probeer behandel en kan die skade verveelvuldig. Die veearts kan presies vasstel of die dier wel vergiftig is en wat die gepaste optrede sal wees.
Simptome
Spiersametrekkings (kan lyk of die hond/kat bewe) en oormatig spoeg.
Die hond/kat gooi op (bloeding in braaksel of stoelgang) en kan ook sukkel met asemhaling.
Die pupille bly klein selfs as daar min lig in die dier se oë skyn.
Pols/hartklop is baie stadiger as normaal (klein hondjies rondom 160 per minuut, groot honde rondom 70 per minuut).
Stuiptrekkings kan voorkom.
Die dier kan sukkel om asem te haal of snak na asem.
Minder algemeen is oormatige urinering, verswakte spierfunksie of verlamming.
Indien jou dier gif ingekry het, kan die volgende gedoen word: Maak seepwater aan (een teelepel seepppoeier op 'n koppie louwater) en gee dit vir hom/haar in sodat hy die gif uitbraak. As jy geaktiveerde houtskoolpille het, gee vir jou hond minstens vier stukke, maak dit fyn, klam met water en gee in.
As jy nie het nie, neem vier snye witbrood en verbrand dit in die oond tot koolstof. Maak dit klam en gee dit stadig in sodat dit die gif in die maag kan absorbeer en neutraliseer. Indien die hond dit gou weer uitbraak gee jy dit weer.
Kry die dier so vinnig moontlik by die veearts.
ARTIKEL: LOUISE MOUTON, SUID-KAAP FORUM-JOERNALIS
'Ons bring jou die nuutste Stilbaai, Hessequa nuus'
