Die rustydtelling in dié SWDRU Presidentsliga Langebergstreek wedstryd was 10-9 in die besoekers se guns.
Met nog sowat 15 minute oor in die tweede helfte het Blue Birds met 22-9 voorgeloop en het die besoekers se ondersteuners al 'n oorwinning voorspel, terwyl die plaaslike ondersteuners taamlik naels gekou het, maar met 'n eindpoging soos min het die tuisspan in die doodsnikke van die wedstryd hul status as ligavoorlopers gestand gedoen en die vreugdevure hoog laat brand in hul tuisdorp.
Heidelberg het weliswaar twee mooi drieë aangeteken wat onderskeidelik deur Gleazon Pietersen, linkervleuel en Gerhard Geldenhuys, plaasvervangerslot, gedruk is in die naelkouperiode, maar hulle sal veel beter moet doen Saterdag, 16 Augustus teen hul ander aartsvyande, Albertinia Rangers wat in hul nek blaas om die voorlopers te word.
Die tuisspan kon wel 'n paar keer die voortou neem deur strafskoppe wat hulle klokslag afgedwing het, maar ongelukkig het die betroubare stelskopper, Carlo Williams ten minste vier skoppe verbrou wat hy op 'n ander dag redelik maklik in punte sou omskep het.
Die besoekers het hul bes probeer om die wedstryd te wen, maar het egter nie met die tuisspan se terugveggees rekening gehou nie.
Benewens die twee drieë, het Williams met drie strafskoppe geslaag terwyl Shergenei Swartbooi, heelagter met 'n straf- en doelskop geslaag het.
Die puntemakers vir Blue Birds was André Matthys, senter met twee drieë, André April, haker met een drie, terwyl Calton Reiners, losskakel twee doelskoppe en een skepskop bygevoeg het.
Die tuisspan se tweedespan het verspot maklik met 41-3 gewen, nadat hulle rustyd met 19-3 voorgeloop het. Levio James, senter het die besoekers se enigste punte met 'n strafskop behaal.
Die puntemakers vir die tuisspan was Bronwille Adams, linkervleuel met twee drieë, terwyl Martinique Riddles, senter, Corbin Swartbooi, losskakel, Duanne du Plessis, slot, Divan Meyer, senter asook kaptein en Michael Hendricks, plaasvervanger heelagter, elk een keer gaan druk het. Swartbooi het ook drie doelskoppe bygevoeg.
Roger Williams, agsteman van Heidelberg rank hier hoog vir die bal terwyl sy spelers hom ondersteun en beskerm.
'Ons bring jou die nuutste Heidelberg, Hessequa nuus'
