MELKHOUTFONTEIN NUUS - Seagulls het Saterdag 10 September 'n wegholoorwinning van 68 - 3 in hul tuiswedstryd teen Prins Albert behaal nadat hulle rustyd met 35 - 3 in hul SWD Superliga B-wedstryd voorgeloop het.
In hul eerste ronde wegwedstryd met Seagulls met 20 - 19 deurgeskuur.
Die tuisspan, wat hard spook om hul plek in die halfeindstryd te verseker, het vanaf die afskop met mening voor- en agterlangs ingeklim om hul stempel af te druk. Hulle het 10 drieë ingeryg om 'n waardevolle bonuspunt te verseker.
Met dié vertoning het die tuisspan weer hul lojale ondersteuners se vertroue herwin en kan hulle na die halfeindstryd op 1 Oktober uitsien.
Vir Seagulls het Hyron October (flank) twee keer gaan druk met Curnol Sollmans (heelagter), Gurdwin Kleynhans (regtervleuel), Jerome Esau (senter), Nathan Buis (senter), Gershom van Rooyen (linkervleuel), Henrico Riddles (slot) en Ralph Visagie (haker) het elkeen een drie gaan druk. Sollmans het agt drieë verdoel.
Seagulls se tweedes het ook gebaljaar en met 40 - 13 geseëvier nadat hulle rustyd met 21 - 13 voorgeloop het.
Vir Seagulls het Tobias Swarts (regtervleuel) 'n driekuns aan drieë behaal, terwyl Riaan Gelderblom (agtsteman), Morné Sefoor (flank) en Jason-Lee Pieterse (stut) elk 'n drie gedruk het.
Delano Jacobs (heelagter) het vyf van die drieë verdoel.
Seagulls speel Saterdag 17 September hul laaste ligawedstryd weg teen Knysna United en hulle sal weereens alles moet uithaal om maksimum punte in te samel.
'Ons bring jou die nuutste Melkhoutfontein, Hessequa nuus'
