HEIDELBERG NUUS - Die eens magtige Crusaders van George is Saterdag 17 Augustus wreed ontnugter toe Heidelberg oor hulle gestoomroller en met 60 - 21 platgevee het.
Heibi het met rustyd in dié Top 8-klubwedstryd met 27 - 14 voorgeloop.
Die wedstryd het 12 drieë opgelewer waarvan Heibi nege en die besoekers drie gedruk het. Marquit September (senter) en Jameson Meyer (losskakel), het vir die tuisspan elkeen twee keer agter die doellyn gaan kuier.
Heibi het al drie wedstryde oortuigend gewen met die C-span wat met 45 - 14 koning gekraai het, terwyl die B-span met 73 - 0 geseëvier het.
Heibi speel Saterdag 24 Augustus weg teen George op Outeniquapark en kan hier 'n taai wedstryd verwag.
‘Ons bring jou die nuutste Tuinroete, Hessequa, Karoo nuus’
