RIVERSDAL KRIEKET NUUS - Riversdal-krieketklub het met die louere weggestap in hul eerste SWD-promosieligawedstryd.
Hulle het Mayflower Saterdag 13 Oktober in hul eerste 50 boulbeurt-veldtog met 'n oorwinning van 40 lopies op Riverville verslaan.
Die besoekers het die loot gewen en die tuisspan ingestuur om in weersomstandighede wat vir naatboulers gunstig was, eerste te kolf. Mayflower was trots na uitstekende boulwerk deur Theo Cedras (5 beurte, 4 paaltjies vir 23 lopies) en Anwar Pietersen (5,4 beurte, 3 paaltjies vir 21 lopies). Hulle het die tuisspan in die moeilikheid gehad met die telling op 70 vir 8 na 19,3 boulbeurte.
Cheslan Cloete (32 van 31 balle) en Riversdal se kaptein, Granwin Scholtz (34 van 33 balle) het met 'n uitstekende vennootskap van 68 lopies van 54 balle om die negende paaltjie gesorg dat hul span by 'n kompeterende totaal van 146 lopies na 30,4 boulbeurte uitkom.
Mayflower was goed op dreef om die wentotaal te bereik met hul telling op 104 vir 6 met hul openingskolwer, Darren Muller (55 van 70 balle) steeds voor die penne. Riversdal se jarelange staatmaker, Jason van Rensburg (6 beurte, 4 paaltjies vir 18 lopies) het van hom ontslae geraak om Riversdal terug in die prentjie te bring. Van Rensburg en Scholtz (6,4 beurte, 3 paaltjies vir 21 lopies) het Mayflower se stertkantkolwers vinnig kleedkamer toe gestuur. Hulle is almal vir 106 lopies na 26,4 beurte uitgeboul, wat aan Riversdal 'n oorwinning van 40 lopies besorg het.
Riversdal se volgende 50 boulbeurt-wedstryd vind op 2 November tuis teen Sussex van Mosselbaai plaas. Hulle is die enigste span uit Hessequa wat na die SWD T20-kompetisie se kwarteindstryd deurdring en speel Saterdag 19 Oktober op Oudtshoorn teen Union Stars.
'Ons bring jou die nuutste Riversdal, Hessequa nuus'
