RIVERSDAL NUUS - Altesaam 342 spelers van regoor die land het Vrydagoggend 7 Oktober opgedaag vir die jaarlikse Hessequa Club Classic veerpyltjiekompetisie by die plaaslike skougronde.
Vanjaar het 16 damesspanne, wat uit vier dames per span bestaan en 32 mansspanne, wat gewoonlik uit ses tot agt mans per span bestaan deelgeneem.
Die kompetisie het die hele naweek geduur en word jaarliks gedurende die eerste naweek van Oktober gehou.
"Ons het 15 jaar gelede met slegs 40 deelnemers begin, maar dit groei elke jaar met rasse skrede," het Alex Faddel (organiseerder) gesê.
Rdl Andrew Stroebel (speaker: Hessequa Munisipaliteit) het in 'n kort verwelkomingsboodskap die spelers bedank dat baie van ver gereis het om deel te neem. "Dit is vir die Hessequa munisipale raad 'n voorreg om julle op ons dorp te ontvang."
Hy het daarna die baan geopen deur die eerste drie veerpyltjies te gooi.
Hy het vooraf gewaarsku dat hy ongeveer 11 jaar gelede ook die baan geopen het en gesê dat dit die laaste keer was wat hy aan 'n veerpyltjie geraak het.
Eerste plek in 180's - dames: Olivia Hendricks (Maatjies) en mans: Charles Cloete (Shamrock).
Dames enkelwenner: Tayla Carolissen (Young Eagles).
Mans enkelwenner: Roberto Werth (Roadblock).
Dames dubbelwenner: Jasmina Goodall en Jenny Grobler (Westerns).
Mans dubbelwenner: Wesley Daries en Garth Henry (Roadblock/Fairways).
Dames speler van die toernooi: Tayla Carolissen (Young Eagles).
Mans speler van die toernooi: Roberto Werth (Roadblock).
ARTIKEL EN FOTO'S: ELIZE BLOM, SUID-KAAP FORUM-JOERNALIS
'Ons bring jou die nuutste Riversdal, Hessequa nuus'
