Gallery Video
RIVERSDAL NUUS - Hoër Landbouskool Oakdale het Maandag 13 April, as stopplek gedien vir die eerste skof van die splinternuwe Garden Route Giro, met plaaslike grondpaaie wat reeds vroeg vir vuurwerke gesorg het.
Die 73 km-roete, wat by Jakkalsvlei Kelder begin het en deur die golwende landskap van Hessequa na Oakdale gestrek het, het vinnige en aggressiewe wedrenne opgelewer.
By die mans het Marco Joubert (Toyota Specialized Imbuko) die dag oorheers deur beide die naelrit en bergpunte in te palm voordat hy Wessel Botha en Cronjé Beukes in die naelrit geklop het om die eerste geel trui te verower.
’n Drieman wegbreekgroep het vroeg gevorm nadat Dan Loubser die tempo op die eerste klim verhoog het.
Joubert het oor die kruin aangeval en saam met Botha en Beukes losgebreek. Met goeie samewerking en ’n gunstige wind het hulle hul voorsprong uitgebou en die res van die veld agtergelaat.
In die vroueafdeling het Mariëlle Trouwborst taktiese vernuf getoon.
Sy het saam met Lisa Bone en Vera Looser weggebreek, maar haar kragte gespaar vir die laaste deel.
Op die laaste klim kon slegs Bone by haar bly, voordat Trouwborst in die naelrit die oorhand gekry het om die skof te wen.
Skof 2, wat vandag, Dinsdag 14 April afgeskop het, beloof om nóg taaier te wees met ’n 119 km-roete en 2 000 meter se klim, insluitend Garciapas en die uitdagende Rooibergpas.
Fietsry-aanhangers kan groot aksie verwag namate die wedren momentum bou.
Skof 2 van die Garden Route Giro eindig in Calitzdorp.
Video: Ben Snyman
‘Ons bring jou die nuutste Tuinroete, Hessequa, Karoo nuus’
