STILBAAI NUUS - Meer as 3 000 liter water is ingesamel en na Albertinia vervoer ter verligting van droogtegeteisterde gebiede.
Louise Christie van Pam Golding het die inisiatief onder haar vlerk geneem via sosiale media en die reaksie was oorweldigend.
Albertinia Meubelvervoer het vroeg in die nuwe jaar besluit om drie van hul vragmotors wat Maandae na Gauteng vertrek, beskikbaar te stel om water daarheen te neem.
Christie vertel dat sy aanvanklik gedink het sy sal sommer 'n paar bottels in haar motor Albertinia toe neem, maar het gou besef toe die bottels begin instroom dat sy 'n ander plan sal moet maak.
Dit was nie moeilik om 'n bakkie te vind en 'n gewillige Stilbaaier om die vrag te vervoer nie, maar dit was te klein vir al die bottels.
'n Plaaslike bouer het tot hul redding gekom met 'n 4 -ton vragmotor en nadat die vrag met die hulp van vrywilligers gelaai is, is dit Albertinia toe vervoer.
Hessequa Munisipaliteit noem in 'n persverklaring dat hulle inisiatiewe wat water opberg en vervoer na die geaffekteerde gebiede ondersteun, maar versoek inwoners om die streek se reservoirvlakke in ag te neem.
"Die aankoop van water word aangemoedig vir verspreiding om dus Hessequa se reservoirvlakke en die lewering van water aan die streek te bevoordeel."
Hessequa word ook hierdeur geraak, soos byvoorbeeld langer tydperke van droogte en onvoorspelbare weerspatrone.
Reservoirvlakke is Dinsdagoggend, 12 Januarie op die onderskeie dorpe gemeet: Heidelberg (100%), Witsand (65%), Slangrivier (85%), Albertinia (44%), Gouritsmond (95%), Riversdal (89%), Garcia (100%), Stilbaai (58%), Jongensfontein (80%) en Melkhoutfontein (50%).
l Vir meer inligting kontak Vanie Oosthuizen by Albertinia Meubelvervoer by 028 735 1470 of 028 735 2057
Werkers van Albertinia Meubelvervoer besig om water in een van die trokke te laai.
Duisende liters water is geskenk.
ARTIKEL: LOUISE MOUTON, SUID-KAAP FORUM-JOERNALIS
'Ons bring jou die nuutste Stilbaai, Hessequa nuus'
