HEIDELBERG NUUS - 'n Leerlinglisensie projek is onlangs in die lewe geroep om hoërskoolleerders met hul leerlinglisensies te bemagtig.
Die projek is onder leiding van Morné Dyason (adjunkhoof: Beskermingsdienste) en hy word bygestaan deur Daniello Michaels (opleidingsbeampte), Evangeline Fielies en Christine Zana (adminstratiewe beamptes).
30 Leerders van skole van Heidelberg, Slangrivier en omliggende plase het vir twee weke na skool elke middag opleiding ondergaan en die toets by die plaaslike munisipale leerlinglisensie-lokaal op Vrydag 27 Mei afgelê, waarvan 21 geslaag het.
Volgens Michaels het leerders self vir hul aansoeke betaal, maar fondse was ook ingesamel om hulle te help. Sommige inwoners het elk R33 per leerder geborg.
"Die plaaslike apteek het ook by die projek ingekoop en elke leerder 50% korting op hul identiteitsfoto's toegestaan. Ons is groot dank aan al die borge verskuldig," het hy gesê. Fielies het genoem dat hulle die projek graag na al die ander dorpe in die streek wil uitbrei.
Sy bedank ook vir Vivian Prins (prinsipaal: Kairos Senior Sekondêre skool) en Carmen Meyer (administratiewe beampte) vir hul bydrae tot die projek.
Die leerders van Kairos Senior Sekondêre skool was deel van 21 wat hul leerlinglisensie-toets geslaag het. By hulle is Evangeline Fielies, Daniello Michaels en Vivian Prins. Foto: Clive Pretorius, korrespondent.
Die leerders van Kairos Senior Sekondêre skool was deel van 21 wat hul leerlinglisensietoets geslaag het. By hulle is Evangeline Fielies, Daniello Michaels en Vivian Prins. Foto: Clive Pretorius, korrespondent.
ARTIKEL: CLIVE PRETORIUS, SUID-KAAP FORUM-KORRESPONDENT
'Ons bring jou die nuutste Heidelberg, Hessequa nuus'
