RIVERSDAL NUUS - Vlermuise is besig om inwoners in Ixiastraat tot raserny te dryf.
Harry Stroebel snr het aan Suid-Kaap FORUM die skade aan hul eiendom uitgewys.
Die vlermuise eet die bessies wat aan die bome op die sypaadjies groei en ontlas dan teen die huise se mure, heinings, op dakke en selfs die plaveisypaadjies en teerpad.
"Ons het al alles probeer om die vlekke te verwyder, maar niks werk nie. My buurman het ten duurste sy huis laat verf en kyk hoe lyk dit," vertel Stroebel. "Die munisipaliteit moet plan maak met die bome wat bessies dra."
Die koerant het Rhett Hiseman van CapeNature genader oor die probleem. "Vlermuise is 'n beskermde spesie. Ek vermoed hierdie is vrugtevlermuise wat Geelhoutbome se bessies eet."
Dat die situasie tydelik van aard is terwyl die bome vrugte dra, is 'n feit aldus Hiseman. "Die verwydering van bome word nie aanbeveel tot alle alternatiewe van beheer oorweeg is nie."
Die onus lê op Hessequa Munisipaliteit om 'n besluit te neem hoe om die vlermuis probleem te takel.
Hiseman het die volgende advies voorgestel om die probleem moontlik aan te spreek. Een manier is om hul roosting gewoontes te ken en sodoende hul roosting-plekke tydens skemer te identifiseer.
Her-evalueer wat die vlermuise lok of aantrek; maak seker alle toegang tot dakke is geseël; verhoed toegang deur fyn hoender mesh oor probleemareas te sit; hang reflekterende foelie van die plafon of in die bome; vir vrugtevlermuise kan 'n vloeistof gespuit word op die bome om vrugte- en bessie vorming te onderdruk; verwyder die vrugte van die boom of installeer 'n ultrasoniese toestel of helder ligte.
Hessequa Munisipaliteit noem in antwoord op 'n navraag hieroor dat 'n item by die Uitvoerende Burgemeesters Komitee (UBK) op Woensdag, 29 Julie sal dien waar hul 'n finale besluit sal neem ten opsigte van die verwydering van die bome in Ixiastraat. Susan Geldenhuys noem dat die vlermuise deur die vroulike geelhoutbome gelok word.
"Intussen is alternatiewe metodes ondersoek om die probleem te beheer. Die munisipaliteit sal 'n afweermiddel in die komende weke op die vrugte spuit . 'n Produk is beskikbaar wat sal veroorsaak dat die boom sy vrugte aborteer, maar dis nie geregistreer vir gebruik in 'n stedelike omgewing nie."
Sy noem ten slotte dat geen item hieroor voorheen by die raad gedien het nie.
"'n Item is ingedien, maar is terugverwys na die skrywer weens die onvolledigheid en het dit nie weer voor die raad gedien nie." Indien daar ander inwoners is in die streek wat dieselfde probleem ondervind kan hul die munisipaliteit kontak sodat die nodige reëlings getref kan word.
Vlermuise is 'n bedreigde spesie
Suid-Afrika het 56 aangetekende spesies vlermuise.
Van die 74 spesies wat in die sub-streek van Suider-Afrika aangetref word is 20 spesies inseketende en twee spesies vrugtevlermuise in die Rooi Data Lys vir bedreigde spesies gelys. Nege van dié is gelys as kritiek, wat beteken die spesies kan uitsterf.
Vlermuise word as Megavlermuise (megachiroptera) en Mikrovlermuise (microchiroptera) geklassifiseer.
Megavlermuise is gewoonlik groot, alhoewel sommiges kleiner as Mikrovlermuise is. Die Megavlermuis het ten volle ontwikkelde oë met klein ore en uitstekende navigasie om voedsel op te spoor.
Hulle leef op vrugte en nektar. Mikrovlermuise is baie klein, het groot ore en klein oë met swak sig en maak heeltemal staat op sonar navigasie. Hul voedsel bestaan uit insekte en klein diertjies. Vampier vlermuise wat nie hier voorkom nie, lewe op bloed.
Vlermuise neem gewoonlik hul intrek in residensiele gebiede weens habitat verlies.
Vlermuise word deur provinsiale wetgewing beskerm.
Alhoewel hulle baie belangrik en voordelig is om 'n balans in die ekosisteem te handhaaf is daar tye, soos nou die geval op Riversdal, waar hul 'n probleem kan raak vir huiseienaars.
Die huis se mure, stoep, sypaadjie en sementheining is bemors met vlermuis ontlasting.
Die toegangshek is erg bevuil.
ARTIKEL: LOUISE MOUTON, SUID-KAAP FORUM - JOERNALIS.
'Ons bring jou die nuutste Riversdal, Hessequa nuus'
