RIVERSDAL NUUS - "Geen polisielid, ongeag hul rang, is verhewe bo die wet nie."
Dit is die woorde van Eugenia Jacobs, streeklanddros Vrydag, 23 Oktober tydens vonnisoplegging aan kapt Mervyn Zana (49), waarnemende stasiebevelvoerder van Suurbraak Polisie in die streekshof op Riversdal. Zana is op 17 September op drie aanklagte, waaronder aanranding, crimen injuria en menseroof skuldig bevind.
Dit spruit uit aanklagte van twee van sy voormalige ondergeskiktes, konst Sharaden Boezak en res/konst Elmarie Cloete, waarin beide aangerand is toe hy van diens af was in 2013.
Op die aanranding en crimen injuria-klagtes is hy met R4 000 of agt maande tronkstraf elk gevonnis. Op die aanklag van menseroof wat Jacobs as 'n baie ernstige misdaad bestempel het, is hy 'n vonnis van twee jaar tronkstraf, opgeskort vir vyf jaar opgelê. Hy is wel geskik bevind om 'n vuurwapen in die hoedanigheid van sy werk te hanteer.
Hy het die reg om binne 14 dae teen die vonnis te appelleer. Tydens haar breedvoerige uitspraak het Jacobs verwys na die feit dat daar vrot appels in die polisiediens is, maar ook dat dit nie veralgemeen moet word nie. Sy het dit pertinent gestel dat, indien Zana in die verlede waar hy ootree het tereggewys was, hy anders sou opgetree het. "U het geglo u is reg."
Die staatsaanklaer was Ania Grasman en die ondersoekbeampte kapt EV le Roux. Zana het na die hofverrigtinge aan Suid-Kaap FORUM gesê dat hy siviele eise teen beide die staataanklaer en die ondersoekbeampte gaan instel.
Dit spruit glo daaruit dat van sy persoonlike inligting uit sy lêer tydens die verhoor geopenbaar is. Cloete, wat ook die hofverrigtinge bygewoon het, het aangedui dat sy nie heeltemaal met die vonnis tevrede is nie.
Klik hier vir vorige artikels:
- Opvolg: Polisiekaptein gevonnis
- Saak teen polisiekaptein uitgestel
- Polisiekaptein skuldig op drie aanklagte
ARTIKEL: CLIVE PRETORIUS, SUID-KAAP FORUM - KORRESPONDENT
'Ons bring jou die nuutste Riversdal, Hessequa nuus'
