ALBERTINIA NUUS - Die wêreldrekordtrui is klaar en reeds na die kantore van die Guinness World Records in London versend.
Die 22 dames wat die breiwerk gedoen het, het verlede jaar, 10 Desember vir oulaas bymekaargekom en gesien hoe ses maande se harde werk opgemeet word. Die poging vir die wêreld se grootste handgebreide trui het amptelik op 14 Junie verlede jaar tydens die jaarlikse Albertinia Aalwynfees begin.
Oor dié tydperk het hulle elke Woensdag vanaf 09:00 tot 14:00 bymekaargekom.
Stadig maar seker het 'n droom gestalte gevind en het die trui 'n werklikheid geword. Dit is Woensdag, 10 Desember amptelik deur 'n landmeter, Francois van der Walt opgemeet en is ongeveer 8.2 meter vanaf die linker- na die regtermou.
Rdl Emor Nel, uitvoerende burgemeester en Denis Joseph, Hessequa LPP het die verrigtinge bygewoon en opgemerk dat dit goed is wanneer 'n groep mense van 'n dorp saamwerk en dit tot voordeel van die hele gemeenskap is.
Die doel van die aanslag op 'n wêreldrekord was om toeriste na die dorp te lok en meer bekend te maak, wat reeds vrugte begin afwerp.
Verskeie koerante, radiostasies, die televisiemedia, onder andere SABC Nuus 2 en 3, asook Dagbreek het oor die trui berig. Toerisme het navrae van toeriste en vakansiegangers oor die Desembervakansie oor die trui ontvang.
Die dames het Woensdag, 21 Januarie weer vergader om die volgende projek te bespreek en te beplan.
Wol: 24 kg
Koste: R5 780
Breiers: 22
Ure: 2 564
Weke: 26
Steke opgesit: 2 360
Meeste gebrei: Babsie Swanepoel met 128 ure
Uitsonderlike breier: Corrie Kruger (72) wat blind is.
Die vroue hoop om die wêreldrekord te breek vir die grootste handgebreide trui.
'Ons bring jou die nuutste Albertinia, Hessequa nuus'
