RIVERSDAL NUUS - Tony Katz, plaasbestuurder van die Hoër Landbouskool Oakdale was verlede week in 'n botsing betrokke op die pad wat verby die silo's loop.
Volgens sersant Edwina Heskwa, media woordvoerder van Riversdal polisie, het die botsing plaasgevind op Donderdag, 9 Julie om ongeveer 06:40.
"Twee voertuie, 'n wit Toyota Hilux bakkie en 'n wit Tata trok was in die botsing betrokke. 'n Saak van roekelose en/of nalatige bestuur is geopen en word tans ondersoek deur Riversdal Speurdiens," het sy bevestig.
Volgens Surette Katz, is haar man per ambulans deurgeneem na Bayview Hospitaal vir 'n skandering, aangesien sy nek baie seer was.
Katz het steke in sy kop en oogbank gekry wat moontlik veroorsaak is deur glasskerwe tydens die botsing.
Suid-Kaap FORUM was Maandagoggend, 13 Julie met Katz in 'n telefoniese gesprek waar hy ons meegedeel het dat hy niks kan onthou van die ongeluk nie, maar dat twee van sy nekwerwels gebreek is en daar is 'n operasie uitgevoer om die werwels te heg.
Hy dra tans 'n nekstut, maar verder voel hy goed.
Hy het ons ook meegedeel dat hy dieselfde dag ontslaan sal word, maar met die tyd van telefoniese gesprek het hy net gewag dat daar nog 'n skandering op hom gedoen moet word.
In 'n opvolg telefoonoproep Dinsdagoggend, 14 Julie het sy vrou bevestig dat hy ontslaan is uit die hospitaal en aansterk by die huis.
Die kajuit binne het ook groot skade opgedoen.
ARTIKEL EN FOTO'S: ELIZE BLOM, SUID-KAAP FORUM - JOERNALIS.
'Ons bring jou die nuutste Riversdal, Hessequa nuus'
