HESSEQUA NUUS - My pelle, Francois en Dulcie hou rêrig van travel, maar hulle verdwaal verskriklik. Nie een het enigsins 'n sin vir rigting nie.
"Ons het hierdie hengse fights oor hoe om te ry as ons eers begin verdwaal. Eenkeer ry ons van Piet-Retief af Nelspruit toe vir 'n troue en begaan die fout om Barberton om te probeer ry. Iewers naby Ermelo kry ons 'n bordjie wat wys Carolina links, Oshoek regs. En by die volgende T-aansluiting kry jy sowaar weer 'n bord wat wys Oshoek, Carolina. Ons moes alrééds hierdie keuse maak. Nou moet ons weer kies! Ons kies weer die Oshoek-rigting. Sowat 20 kilometer verder wys die volgende bordjie Oshoek, Chrissiesmeer. En ons wil nié na een van dié plekke toe nie!
Hoe nou gemaak? wonder ons. En dis net daar waar ons begin verskil! En dan wraggies, dan kry jy sowaar nog 'n bord... Carolina, Oshoek! By hierdie tyd sit ons al behoorlik vas. Waarom is daar nêrens 'n bord wat net kan wys BADPLAAS nie? Om nie eers van 'n BARBERTON-bord te praat nie! Lateraan is ons so keelvol vir Chrissiesmeer en Carolina dat ons oorbluf dink alle paaie lei daarheen! Ons het omtrent goed gesukkel. Daai paaie daar - dit is nou regtig deurmekaar!
Maar ons kan selfs verdwaal al is daar nie so baie paaie nie! Eenkeer toer ons saam met vriende in die Kalahari, maar verdwaal so dat die mense later besluit om vir ons briefies op die bome by pad-aansluitings te los. Dit het gehelp, maar pleks leen hulle net hul GPS vir ons. Hulle het seker later ook hieraan gedink en ons daardie middag 'n blits GPS-kursus gegee. Nou weet ons van Global Positioning System en satelliete en alles... en net daar is ons ge-convert!
'n GPS is een van die most amazing uitvindings ooit! Dit is vreeslik clever! So koop ons, ons eie GPS toe ons in Engeland aankom en ry die plek behoorlik plat - sonder enige probleme. Selfs Parys was nie meer 'n nagmerrie-navigation-uitdaging nie. En toe ons boonop uitvind hoe om die GPS in te span om besienswaardighede op te spoor, gaan kamp ons summier in die middel van Parys. Man, ons ry soos ou, gesoute gidse tot reg voor die kampeerplek se hek, smack bang in die middel van Parys.
'n GPS is sowaar 'n magic ding. Dit het beslis al my en Francois se marriage gered!"
'Ons bring jou die nuutste Hessequa nuus'
