STILBAAI NUUS - Die koördineerders van die onderskeie buurtwagte op die dorp het op Donderdag, 2 Julie vergader.
Tans is daar 10 werkende buurtwagte wat op verskeie maniere toesien dat die onderskeie buurte veilig is.
Die buurtwagte van die Hawegebied, Jongensfontein, Palinggatoord en Platbosch maak gebruik van magneetborde vir hul voertuie wanneer hulle op patrollie gaan.
Die buurtwagte van die Hawegebied, Jongensfontein en Platbosch het formele identifikasiekaartjies vir hulle koördineerders en blokleiers en sommige aktiewe lede.
Die aksies, gedrag en optredes van bosslapers is 'n sosiale probleem en is na die Stilbaai Gemeenskaps Polisiërings Forum (GPF) verwys.
Kerneels Swanepoel, koördineerder van die Stilbaai Hoogte buurtwag vra dat die teenwoordigheid van bosslapers of swak gedrag van haweloses aangemeld moet word by Hessequa Wetstoepassing by 082 443 0390 of Stilbaai Polisie by 028 754 6100. Probleme wat veroorsaak word deur naguile by kuier- en drinkplekke in die laatnag of vroeë oggendure is ook na die GPF verwys.
- In die Hawegebied word tans gekonsentreer op roekose bestuur en die identifisering van gevaarsones.
- In Kloofsig word inwoners gevra om 'n eenmalige bydrae van R50 te maak.
- Belangstelling in die buurtwag van Melkhoutfontein kwyn om verskillende redes. Die polisie se afdelings Visuele Polisëring en Sub-sektorpolisiëring, in oorleg met die buurtwag en GPF, skenk hieraan aandag.
- Palinggatoord is in vier sones verdeel. 'n Opname van siekes, bedlêendes en hulpbehoewendes word tans gedoen.
- Platbosch is in 15 blokke ingedeel waarvan 13 reeds onder leiding van die blokleiers aktief en funksioneel is.
- In die Preekstoelgebied is alles stil en rustig – daar is net twee permanente inwoners.
- In Stilbaai Hoogte werk die drie kommunikasiekanale en -middels, naamlik WhatsApp, die Facebook-bladsy en 'n e-pos-stelsel bevredigend. Inwoners is veral in hulle skik met beurtkrag-aangeleenthede wat Dries de Beer gereeld en op datum onder hulle aandag bring.
Stibaai-Oos het te kampe met spoedvrate in Hoofweg-Oos.
Die koördineerders van die onderskeie buurtwagte is: Hawegebied – Johannes Pretorius; Jongensfontein – Johan Lötter; Kloofsig – Frans Malherbe; Melkhoutfontein – Chrysel Conradie; Palinggatoord – Roelof Maree; Platbosch – Willem Oelofse; Preekstoel – Anson Heemro; Stilbaai Hoogte – Kerneels Swanepoel en Stilbaai-Oos – Mike Steytler.
'Ons bring jou die nuutste Stilbaai, Hessequa nuus'
