RIVERSDAL NUUS - Beide Riversdal Blues se spanne het Saterdag 6 Augustus na die finale van die Presidentsliga (Langebergstreek) deurgedring met hul seges van 12-7 en 23-13, nadat hulle rustyd met 7-0 en 10-8 onderskeidelik voorgeloop het.
Dié wedstryde vind Saterdag 13 Augustus op Outeniqua Park plaas.
Heidelberg Rugbyklub se eerste en tweede spanne is Saterdag binne twee weke weereens wreed deur Blues ontnugter met hierdie nederlae. Beide spanne het deurgaans hul ondersteuners tot aan die einde baie spanning besorg.
Die besoekers het binne twee minute vanaf die afskop 'n gulde geleentheid om die eerste punte aan te teken, verbrou toe Corbin Swartbooi (heelagter) met 'n verspot maklike strafskop gefaal het. Swartbooi, wat die afgelope seisoen baie sukses met sy skopskoen behaal het, het Saterdag nie die mas opgekom nie en het dit die trant vir die verloop van die wedstryd bepaal.
Die tuisspan het weer eerste punte aangeteken met 'n drie deur Nathan Jafta (linkervleuel) in die 22ste minuut, wat deur Petrus Flink (senter) verdoel is. Heidelberg kan net hulself blameer vir dié nederlaag, aangesien hulle baie onnodige foute begaan het deur verkeerde besluite te neem.
Hulle het ook twee sekere drieë met swak hanteerwerk na 'n oop doellyn verbrou. Hulle was egter in die doodsnikke beloon met 'n strafdrie onder die pale toe die skeidsregter, wat vir sy hantering van die wedstryd geloof moet word, die tuisspan gestraf het. Swartbooi het dié drie verdoel.
Heidelberg, wat soveel belofte gedurende die afgelope seisoen ingehou het, het male sonder tal goeie balbesit doelloos rondgeslinger en sodoende hard bekomde balbesit prysgegee. Hoewel dit 'n goeie spanpoging van die tuisspan was, moet Mattlin Fielies, Blues se woelwater-flank en onderkaptein se naam genoem word wat 'n doring in sy teenstanders se vlees was.
Die puntemakers van die tweede spanne is: Blues - Jason Jacobs (haker) en Michael Hendricks (agsteman) het elk 'n drie gedruk. Nicky Sedi (regtervleuel) het met drie straf- en twee doelskoppe geslaag. Heidelberg - Martin Hartnick (agsteman) en McDonald Marais (heelagter) het elk 'n drie gedruk, met Bronwille Adams (linkervleuel) wat met 'n strafskop geslaag het.
Die wedstryde is voorafgegaan met 'n baie suksesvolle sportnaweek deur Gerrit du Plessis Senior Sekondêre skool, wat grootliks vir die rekord aantal toeskouers gesorg het.
Die SWDRU Presidents- en Premierligas se finale vind Saterdag 13 Augustus op Outeniqua Park plaas.
Presidentliga
Beide Riversdal Blues se eerste en tweede spanne speel teen Maoris van George. Maoris het met Willowmore in hul semi-finaal afgereken.
Premierliga
In die Premierliga finaal vir eerste spanne speel Barbarians van Mosselbaai teen Evergreens van Pacaltsdorp nadat hulle die afgelope Saterdag vir Progress van Rosemore, George met 49-27 kafgedraf het.
BaaBaas, soos hulle bekend is se tweede en derde spanne het ook tot die finale deurgedring deur die spanne van Groot-Brakrivier onderskeidelik met 31-12 en 13-3 te wen.
Hulle speel teen die spanne van Bridgton (tweede) en Evergreens (derde).
ARTIKEL: CLIVE PRETORIUS, SUID-KAAP FORUM-KORRESPONDENT
'Ons bring jou die nuutste Riversdal, Hessequa nuus'
