ALBERTINIA NUUS - Die forensiese ondersoek na bewerings van wanbestuur by Hoërskool Albertinia is afgehandel.
In 'n e-pos vanaf Ruthven Janse van Rensburg (hoofdirekteur: Provinsiale Forensiese Dienste, Wes-Kaap) word bevestig dat die beweerde bedrae foutief was en dat die ondersoek getoon het dat alle gelde wel op die skool se bankstate reflekteer.
"Die saak is nou gesluit na die afhandeling van die forensiese oudit en regverdig geen verdere ondersoek nie." Die status van die saak is nou gesluit.
Volgens inligting het die aanvanklike berigte oor die beweerde bedrog en wanbestuur die skool baie skade berokken met heelwat ouers wat hul kinders uit die skool gehaal het om in Riversdal skole te sit. André Bouwer, waarnemende skoolhoof noem dat hulle die kwessie as afgehandel beskou en is verlig dat die skool in die reine gestel is.
"Ons gaan in geen verdere aksies betrokke raak nie en gaan fokus op die opbou van die skool, asook die onderwys van ons kinders."
Fred Carelse, 'n ouer by die skool en ook Hessequa raadslid het die bewerings van wanbestuur aanhangig gemaak nadat hy in Februarie deur die beheerliggaam gekoöpteer is om op die skool se finansiële komitee te dien. Hy het beweer dat die ongerymdhede onder die mat gevee word.
Klik hier vir vorige artikels:
- Skool se geldsake skoon
- Skool verkla by Openbare Beskermer
- Opvolg: Beweerde wanbestuur by skool
- Beweerde wanbestuur by hoërskool
ARTIKEL: LOUISE MOUTON, SUID-KAAP FORUM - JOERNALIS
'We bring you the latest Albertinia, Hessequa news'
