STILBAAI NUUS - Marli Dercksen, dogter van bekende inwoners, Len en Ria Kruger het onlangs 'n besonderse Phd in Kliniese Biochemie voltooi aan die universiteit van Amsterdam.
Sy het meer hieroor vertel in 'n e-pos aan Suid-Kaap FORUM. “Ek het in 1999 by die Noord-Wes Universiteit (destyds PU vir CHO) my B.Sc-graad in Biochemie en Mikrobiologie begin met groot onsekerheid oor wat ek nog eendag in my lewe gaan doen.”
Tydens haar voorgraadse studies het dit vir haar duidelik geword dat sy belangstel in menslike genetika en het haar nagraadse studies tot M.Sc vlak in Biochemie voltooi.
Gedurende die studies het sy begin werk by die Potchefstroomse laboratorium vir aangebore metaboliese siektes (PLIEM). Hieruit het haar passie ontwikkel vir pasiëntjies, meestal babas met rare genetiese metaboliese siektes.
In 2009 ontvang sy 'n beurs by die Koninklike Nederlandse Akademie vir Wetenskappe om 'n Ph d in Kliniese Biochemie aan die universiteit van Amsterdam te doen.
“Dit was ’n groot verrassing en eer en ek het die uitdaging aanvaar. Haar Ph d studie was getiteld Isovaleric acidemie: An integrated approach toward predictive laboratory medicine en het meer as vyf jaar geneem om te voltooi.
"Ek het die geleentheid gehad om saam die grootste spesialiste in die veld van metaboliese siektes in die wêreld te werk wat my passie meer verdiep het.” Vir haar was dit 'n groot uitdaging om haar persoonlike, akademiese en beroepslewe in balans te hou en ook voltyds by PLIEM te werk.
“Met Tiaan, my man, my familie en vriende se liefde en ondersteuning kon ek die Ph d-graad voltooi en op 19 September ontvang in Amsterdam.”
Vandag is sy die hoof diagnostikus en bestuur sy die Potchefstroom Laboratorium vir aangebore metaboliese siektes wat ook die enigste van sy soort is in Suid-Afrika. “Dit is voorwaar vir my ’n groot voorreg om ’n verskil te maak in die lewens van families en kinders wat geraak word deur rare genetiese metaboliese siektes.”
ARTIKEL: LOUISE MOUTON, SUID-KAAP-JOERNALIS
'Ons bring jou die nuutste Stilbaai, Hessequa nuus'
