HESSEQUA NUUS - Laer- en hoërskole spandeer jaarliks baie groot begrotings aan hul revues, omdat dit gewoonlik ‘n groot bemarkingsprojek is.
Lefra Produksies het besluit om ‘n verdere lewe aan skole se revues te gee met REVUE SA 2016, ‘n nasionale kompetisie wat by Carnival City se Big Top Arena aangebied gaan word van 5 tot 21 September.
Die sluitingsdatum vir inskrywings is Vrydag 12 Augustus.
Die kompetisie gaan op ‘n uitdunbasis aangebied word en ‘n mate van ‘n realiteitsgevoel sal in die aanbieding wees.
Die volle Revue SA 2016 word verfilm vir moontlike uitsending later op televisie. Die aanbieders en beoordelaars gaan van hoogstaande gehalte wees en sal dié wees wat al diep spore in die bedryf getrap het.
Groot pryse kan deur skole gewen word, asook die volgende kontantpryse: Laerskole (per skool) - eerste prys R10 000, tweede prys R5 000, derde prys R3 000. Hoërskole (per skool) - eerste prys R10 000, tweede prys R5 000, derde prys R3 000 en die oorkoepelende wenner kan met R15 000 wegstap - dit kan 'n laer- of hoërskool wees.
Besoek www.revues.co.za vir die reëls, regulasies, inskrywingsvorm en meer inligting.
'Ons bring jou die nuutste Hessequa nuus'
