RIVERSDAL NUUS - Paul Draai, 'n plaaslike brandweerman het 'dubbele heldestatus' verkry deur nie net lewens in sy beroep te red nie, maar ook bloed te skenk.
Inwoners het weer gehelp om lewens te red deur Donderdag 11 April by die burgersentrum bloed te skenk. Altesaam 106 mense, onder wie 11 nuwe skenkers, het opgedaag en altesaam 96 eenhede bloed geskenk.
Draai verduidelik hoekom hy bloed skenk: "Omdat ek by die brandweer werk besoek ons dikwels ongelukstonele en ek sien hoe baie bloed beseerde mense verloor. Familielede moes ook al bloed ontvang. Dit het my laat besef hoe belangrik dit is om bloed te skenk – daarom het ek vandag begin skenk." Hy wil ook ander motiveer om te skenk.
Ronald Davids, Wes-Kaap Bloeddienste se streekbestuurder van George het kom besoek aflê en met skenkers gesels.
Vir meer inligting, SMS 'Bloed' na 33507 en WPBOD sal jou terugskakel met inligting oor waar om te skenk.
Skenkers kan ook 021 507 6300 skakel, 'n e-pos aan info@wpbts.org.za stuur of die webtuiste www.wpblood.org.za besoek.
• Jy kan weer op die volgende datums by die Riversdal-burgersentrum bloed skenk: 20 Junie, 15 Augustus, 24 Oktober en 19 Desember.
'Ons bring jou die nuutste Hessequa nuus'
