EDEN-DISTRIK RUGBY-NUUS - Heidelberg se tweede span het Saterdag 19 Augustus op Mosselbaai tydens die SWDRU Premierliga halfeindronde net-net met 19-18 teen die tuisspan, Barbarians, vasgeval, nadat hulle rustyd met 6-5 voor was.
Die wedstryd het op die D'Almeida Park-stadion plaasgevind. Die tuisspan se derde en eerste spanne het beide hul wedstryde teen onderskeidelik Groot-Brakrivier en Crusaders redelik gemaklik met 37-10 en 54-34 gewen. Met dié oorwinnings dring al drie Baa-Baas-spanne deur na die SWDRU-eindronde wat Saterdag 1 September op Outeniquapark plaasvind.
Heibi kan net hulself blameer dat hulle nie die wedstryd op 'n wennoot beklink het nie, aangesien hulle baie geleenthede geskep het wat hulle deur hul vingers laat glip het. Skopwerk pale toe het hulle ook duur te staan gekom. Aan die ander kant het Baa-Baas hul kanse redelik goed gebruik om die knoop deur te haak.
Vir Mosselbaai het Chester Mitchell, regtervleuel, Leolin Mondo, heelagter en Marthinus Adonis, agsteman, elk een drie gedruk, terwyl Mondo en Dominique Lombard, senter, elk met een doelskop geslaag het.
Heibi se punte is deur Roger Williams, flank, wat twee drieë gedruk het, Carlo Williams, regtervleuel, met twee strafskoppe en Shirgené Swartbooi, heelagter, met een doelskop, aangeteken.
'Ons bring jou die nuutste Tuinroete, Hessequa, Karoo nuus'
