RIVERSDAL NUUS - Evert Kleinhans (30) en Quentin Hands (29) het Dinsdag, 10 November in die Riversdal Landdroshof verskyn vir 'n formele borgaansoek nadat hul gearresteer is op klagtes van handel, kweek en besit van dagga.
Hulle bly in aanhouding tot Dinsdag, 17 November vir voortsetting van die borgaansoeke en word aangehou in die gevangenis op George.
Beide is Woensdagmiddag, 3 November deur lede van die Mosselbaai K-9 honde-eenheid gearresteer vir dagga ter waarde van R30 000. Die eenheid het 'n hof-, asook arrestasiebevel bekom van die landdroshof op Mosselbaai om die plaas waar Kleinhans woon te visenteer.
Dit is gedoen na verskeie transaksies met hom gedoen is sedert Augustus vanjaar, met die laaste transaksie wat op 7 September plaasgevind het. Tydens die uitvoer van die hofbevel is verskeie kultivars dagga wat op die perseel gegroei het, asook 'n tuisgemaakte laboratorium ontdek.
Dit was ingerig vir die kultivering en stimule-ring van 'n plantasie. Meer as 300 daggaplante en 150 gram hoëgraad verwerkte dagga en laboratoriumtoerusting is gekonfiskeer. Die waarnemende cluster bevelvoerder vir Da Gamaskop polisiëringsgebied, kol Clive Kaptein het die betrokke polisielede gelukgewens vir hul vinnige reaksie en deursettingsvermoë.
Hy het belowe dat dié tipe gesamentlike operasies sal voortgaan om dwelms uit gemeenskappe te kry.
Kleinhans het na 'n vorige arrestasie, waartydens 67 daggaplante en laboratoriumtoerusting gekonfiskeer is, 'n voorlopige staking in vervolging teen hom ontvang vir die besit en verbouing van dagga. Dié hofbevel is op 30 Oktober 2014 in die Wes-Kaapse Hooggeregshof uitgereik. Hy betwis sy grondwetlike reg om sekere voorskrifte van die Wet op Dwelms en die Wet op Medisyne grondwetlik te betwis.
Die Suid-Afrikaanse dagga aktiviste, Jules Stobbs en Myrtle Clark het hom met dié aansoek bygestaan. Kleinhans is van mening dat sy, asook 'n groot meerderheid van Suid-Afrikaners se menseregte word aangetas en dat dagga se wetenskaplike en mediese waarde reeds wêreldwyd vasgestel is.
Klik hier vir vorige artikels:
- Dagga: 2 bly in aahouding tot 17 November
- 2 vas vir dagga bly in aanhouding
- 2 mans van Stilbaai vas vir dwelms
ARTIKEL: LOUISE MOUTON, SUID-KAAP FORUM - JOERNALIS
'Ons bring jou die nuutste Riversdal, Hessequa nuus'
