HESSEQUA NUUS - Hoewel dit die afgelope maand heelwat gereën het, is waterbeperkings in die gebied reeds geruime tyd in plek.
Beide damme, die Duivenhoksdam by Heidelberg en die Korentepoortdam by Riversdal is reeds albei 100% vol.
Hoewel die watersituasie goed lyk in die gebied bly waterbeperkings steeds in plek en moet inwoners moeite doen om in 'n nuwe waterverbruikpatroon te kom.
'n Inwoner was in kontak met Suid-Kaap FORUM met die vraag waarom die Korentepoortdam nie vergroot kan word nie, aangesien die damme nie groter word nie, maar die bevolking wel.
By navraag of die damkapasiteit vergroot gaan word, antwoord Johan Jacobs, munisipale bestuurder dat dit een alternatief is wat in die Hessequa Water Dienste Ontwikkelingsplan (WDOP) van 2011/12 aangedui word, sowel as die vergroting van die Kristalkloof.
"Die koste hiervoor word egter geraam op meer as R100 miljoen en die munisipaliteit is tans besig in samewerking met die Ontwikkelings Bank van Suider Afrika met 'n aansoek aan die Departement van Water en Sanitasie wie die beherende owerheid is van die dam."
Die WDOP bevat verskillende alternatiewe vir water aanvulling aan op Riversdal omdat die toegelate water kwota vir die dorp vanaf die Korente/Vetterivier Besproeiingsraad jaarliks met meer as 130 000m³ oorskry word. In 2014 het Riversdal sy toegelate kwota van 1 200 000m³ per jaar, met meer as 450 000m³ oorskry.
Dit kan meestal toegeskryf word aan geen waterbesparingsmaatreëls nie, asook die goeie reën neerslae die afgelope twee jaar. Die kwota is veral krities tydens droeër en lae reënvalperiodes omdat daar ander verbruikers in die landboubedryf is wat ook water uit die Korentpoortdam ontvang.
Klik hier onder vir vorige artikels:
- Belangeforum vra permanente waterbeperkings
- Waterbeperkings moontlik permanent
- Hessequa waterbeperkings gaan voort
- Waterbeperkings in Hessequa
- Lig in die tonnel vir Witsand-water
- Play your part in saving water
'Ons bring jou die nuutste Hessequa nuus'
