STILBAAI NUUS - Omstandighede in ag genome gaan dit tans goed met die twee jongmans van die dorp wat Sondag, 7 Junie ernstig in 'n ongeluk by Skerpkoppies beseer is.
Konstabel Gavlin Green, verbonde aan Stilbaai Polisie en Shawn Swart, werksaam by 'n plaaslike sekuriteitsmaatskappy sterk tans aan in onderskeidelik die Bayview en George Hospitale. Green se regterbeen is onder sy knie afgesit.
Sy regtervoet wat nie gevind kon word op die toneel nie, is later in die voertuig opgespooor en aan die Forensiese Patalogiese Dienste op Riversdal oorhandig.
Volgens ao Morné D'Emiljo het Green 'n baie goeie ondersteuningsnetwerk en klink hy positief. "Hy is in goeie hande en ontvang die nodige terapie, maar daar lê 'n lang pad van herstel vir hom voor." Swart het ook ernstige beserings opgedoen en is drie penne in sy been gesit.
Suid-Kaap FORUM was in gesprek met Linda Franken, Swart se verloofde en volgens haar het hy steeds 'n oop wond aan sy regterbeen. Die dokter het hom Maandag, 15 Junie meegedeel dat hul steeds nie met die nodige veloorplantings kan begin nie, omdat hul nie tevrede is hoe die libia herstel nie.
"Hy kry daagliks ongeveer drie punte bloed aangesien hy steeds baie bloed verloor." Sy linkerbeen is ook in 'n stut en het gate in wat gesond moet word.
"Sy gemoedstoestand is goed, maar hy was erg geskok toe die dokter vir hom gewys het hoe sy been lyk. Hy is sterk, maar is by tye emosioneel en ongelukkig."
Swart sal waarskynlik nog lank behandel word in George Hospitaal.
Vorige artikels:
- Opvolg: Motorongeluk eis voet en been
- Twee van Stilbaai ernstig beseer
- Opvolg: Man verloor voet na ongeluk
- Man verloor voet in motorongeluk
Verwante artikels:
- Jongman sterf in motorongeluk
- N2 gru-ongeluk:Massabegrafnis vir slagoffers
- N2 gru-ongeluk: Trokbestuurder in aanhouding
- N2 gru-ongeluk:Trokbestuurder bly in aanhouding
- 8 sterf in gru-ongeluk naby Swellendam
Konst Gavlin Green. Foto: Louise Mouton.
Die ongelukstoneel by die Swartkoppies blinde draai. Inlas: Die voertuig het die reling getref. Foto's: Louise Mouton. Inlas: Die voertuig na die ongeluk. Foto: verskaf.
ARTIKEL: LOUISE MOUTON, SUID-KAAP FORUM - JOERNALIS.
'Ons bring jou die nuutste Stilbaai, Hessequa nuus'
