RIVERSDAL NUUS - Wat 'n doodgewone landing op Riversdal se vliegveld moes wees, het amper Woensdag, 13 Januarie ontaard in 'n botsing tussen 'n bakkie en 'n gyrocopter.
Craig Boswell, vlieënier van die gyrocopter, vertel: "Met my terugkeer van 'n uitvlug na Ceres toe ek wou land, gewaar ek ‘n wit bakkie op die aanloopbaan. Die persoon was duidelik besig met bestuurslesse. Die dame aan die stuur het haar boeglam geskrik toe ek van agter oor hulle vlieg om hulle te waarsku om die aanloopbaan te ontruim sodat ek kon land!
"Alhoewel daar duidelik konsternasie in die voertuig was, het hulle geweier om die aanloopbaan te ontruim - dit het my drie oorvlugte geneem voor die persone in die voertuig die boodskap gekry het dat hulle nie eintlik daar welkom was of hoort nie! Indien ek ’n noodlanding moes doen op daardie tydstip, sou daar groot probleme gewees het."
Volgens Boswell is die vliegveld al ’n geruime tyd weer in gebruik deur die huurders (’n lugvaart maatskapy, Rivaero), asook die algemene lugvaartbedryf en is hierdie maar een van 'n paar gevalle waarby ongemagtigde persone op die vliegveld betrokke was.
Hy vertel dat beeste soms losgelaat word om te wei aan die gras langs die aanloopbane, daar word soms met honde sonder leibande gestap en daar was al selfs gholfballe wat geslaan word langs die aanloopbaan. Volgens hom kan hierdie en ander ongemagtigde gebruik van die vliegveld tot ernstige vliegongelukke lei.
Hoewel daar huidiglik geen heinings rondom die vliegveld is nie, word die publiek versoek om nie die vliegveld of die aanloopbaan te betree nie. Volgens Boswell is die huurders, met die samewerking van die munisipaliteit, in die proses om wel die vliegveld te omhein.
Die publiek se samewerking word gevra in hierdie verband. Vir enige navrae rakende die vliegveld kan Rivaero gekontak word by 082 344 7873.
Craig Boswell op sy eind benadering na Riversdal vliegveld.
'Ons bring jou die nuutste Riversdal, Hessequa nuus'
